الصدمة ! - قصص قصيرة

قصة الصدمة 

قصة قصيرة - قصص رعب 😱

قصص قصيرة

صاحب الشقه اللي كنت عايش فيها مع اصاحبي 
قرر فجأه و بدون أي مقدمات إنه هيزود الايجار للضعف بدايه من الشهر الجديد والحقيقه محبناش ندخل معاه في أسئله ومناقشات عارفين إنها في الآخر مش هترجعه عن قراره 

علشان كده طلبنا منه مهله اسبوع بالكتير 
علشان ندور علي سكن تاني 
قالنا هما يومين مفيش غيرهم 
قلنا له ماشي 

نزلت مع اصحابي وبدأنا ندور علي سكن
يكون إيجاره معقول وكمان يكون قريب من الجامعه الحقيقه لقينا شقق كتيره لكن أسعارها غاليه جدا 
كنا في حيره وفقدنا الامل اننا نلاقي شقه إيجاره معقول ولما يأسنا قررنا نرجع السكن واحنا ماشيين بالصدفه لمحت بيت من دورين والدور الاول مكتوب عليه للايجار قلت لاصحابي [ محمد ، احمد ] 
تعالوا كده يا رجاله نشوف الشقه دي 
ويارب يكون سعرها معقول 

وقبل ما نوصل للبيت بخطوات بسيطه 
لقيت شاب خارج منه اول ما شافنا بنقرب عليه 
وقف مكانه وبص علينا
قلت له لو سمحت احنا طلبه في الجامعه وعايزين نأجر الشقه اللي هنا
قالنا تحت امركم تعالوا اتفضلوا 

دخلنا معاه الشقه واتفرجنا عليها لقيناها مفروشه 
وكانت 3 اوض وصاله ومطبخ وحمام وبلكونه 
قلت له طب بالنسبه للإيجار هيكون كام
قالنا الشقه بتتأجر مفروش وطبعا إيجارها غالي 
لكن علشان انتوا طلبه مش هنختلف عليه اللي تقدروا تدفعوه شكرته جدا وقلت له 
طيب ممكن نمضي العقد مع حضرتك امتي 
قالنا دلوقتي لو حبيتوا 

محمد صاحبي قالي انا همضي العقد مع الاستاذ حسام وانت يا أمير خد معاك احمد وروحوا السكن هاتوا الحاجات اللي تخصنا ومتتأخروش 
مشيت انا واحمد وكنا مبسوطين جدا اننا اخيرا لقينا شقه وايجارها معقول وكمان ومفروشه 

ولما رجعنا تاني للسكن اللي كنا عايشين فيه 
اتصلت بالاستاذ حسين صاحب السكن عرفته اننا لقينا شقه وطلبت منه انه يجيلنا دلوقتي علشان يستلم الشقه وياخد المفتاح قالي ربع ساعه وهجيلك
خلال الوقت ده كنت انا واحمد بدأنا نلم كل حاجه تخصنا وبعد ما انتهينا لقينا الاستاذ حسين بيخبط علي الشقه فتحت ليه وقلت له اتفضل المفتاح اهو واستلم شقتك قالنا لقيتوا سكن بالسرعه دي

قلت له ايوه الحمدلله ومحمد صاحبنا هناك بيمضي العقد مع الاستاذ حسام
قالنا والسكن ده قريب من هنا ولا بعيد
قلت لا مش بعيد وبعد ما وصفت ليه عنوان البيت لقيت الاستاذ حسين بانت علي وجهه علامات الصدمه
وقالنا البيت اللي انتوا بتقولوا عليه ده 
اصحابه قفلوه وسافروا من حوالي سنه 

" بعد ما حسام ابنهم الوحيد مات محروق في الشقه "

النهاية.

تعليقات



حجم الخط
+
16
-
تباعد السطور
+
2
-