القائمة الرئيسية

الصفحات

قصة لغز الدوائر الحمراء - قصة قصيرة

قصة لغز الدوائر الحمراء 

قصة قصيرة 

قصص رعب 😱👻



قصص قصيرة
قصة لغز الدوائر الحمراء - قصة قصيرة



من وقت للتاني لما بكون مخنوق بروح اقف علي كوبري زفتي بالساعتين 
والتلاته وأتأمل منظر البحر والمراكب الصغيرة وهي بتعدي من تحت الكوبري واتفرج علي منظر غروب الشمس وبعد كده امشي

وفي مره كنت واقف علي الكوبري طلعت الموبايل من جيبي وخدت صورة سيلفي ليا وقبل ما انزلها علي الانستجرام لاحظت حاجه غريبه
لقيت شخص قصير واقف ورايا في الصورة 
إستغربت لان مكانش في اي شخص موجود علي الكوبري وقت ما خدت السيلفي عملت زووم علي الشخص ده لقيت عينه الشمال لونها اخضر والعين اليمين لونها اسود وعليها دايرة باللون الاحمر 
بصراحه اضطريت امشي بسرعه 
لاني حسيت بخوف غير طبيعي

رجعت البيت ودخلت اوضتي وتجاهلت الصورة تماما تاني يوم نزلت افطر في المطعم اللي تحت بيتي وقبل ما امشي خدت صورة سيلفي 
بدأت أحس ان في حاجه مش طبيعيه بتحصل بعد ما شوفت شخص واقف ورايا في الصورة للمره التانيه
مع ان مكانش في حد غيري في المطعم 
عملت زووم علي صورة الشخص ده لقيت عينه الشمال لونها اسود وعليها دايرة باللون الاحمر والعين اليمين لونها اخضر المره دي كان عكس الشخص اللي ظهرلي في سيلفي الكوبري

مبقتش عارف ايه سر الدواير اللي علي العين 
وليه انا تحديدا بيظهرلي حاجه زي كده دفعت الحساب ومشيت وصلت البيت عملت فنجان قهوه وقعدت قصاد التليفزيون وبعد حوالي ساعه 
جالي فضول غريب اني اصور نفسي سيلفي

جبت الموبايل واتصورت اكتر من عشرين صورة سيلفي في اماكن متفرقه في الشقه بعد ما اكتفيت بالتصوير قعدت في الصاله وبدأت اتفرج علي الصور 
لقيت من ضمن العشرين صورة 
خمس صور ظاهر فيها 5 اطفال 
والغريبه ان كل طفل منهم في دايرة باللون الاحمر علي مكان معين في الرأس و الوجه

هنا اعتقدت ان الاشخاص اللي بيظهروا ورايا في صور السيلفي عايزين يوصلوا ليا رساله معينه من خلال الدواير اللي باللون الاحمر اللي بتظهر عليهم بإنها عامله زي لعبه بازل وان مطلوب مني اجمع الدواير مع بعضها علشان يظهرلي شكل شخص معين اللي هو يعتبر اللغز لكن كان في أسئله كتيرة 
للأسف ملاقتش ليها اجابه

* ليه الاشخاص دي بتظهرلي شخصيا
* طيب هل هم احياء ام اموات 
* طيب لو قدرت اجمع الدواير الحمرا ببعضها وظهرلي شكل شخص ما ايه علاقه الشخص اللي هيظهر من تجميع الدواير بالاشخاص دي

عملت فنجان قهوه آخر ودخلت اوضتي و وصلت الموبايل باللابتوب وبدأت أقص الدواير الحمرا اللي ظهرت علي وجوه الاشخاص في صوري السيلفي
وبما اني عندي خبره بالفوتوشوب الي حد ما كويسه الا ان الموضوع مكانش بالسهوله زي ما انتوا متصورين حقيقي تعبت جدا علي ما قدرت اقص واجمع الدواير ببعضها العيون ببعضها ولون الشعر وحجم الانف والفم و و ..إلخ

وقبل ما انتهي من تجميع الدواير ببعضها ولعت سيجارة ورجعت بذاكرتي لخمس سنين فاتوا وافتكرت الايام الصعبه اللي قضيتها في احدي المصحات النفسيه
لكن مقدرتش افتكر السبب اللي دخلني المكان ده

خلصت السيجارة وبعد ما جمعت الدواير ببعضها قدرت احل اللغز وعرفت ان الشخص اللي ظهرلي
قتل جميع الاشخاص اللي ظهروا ورايا في صور السيلفي بعدها ضحكت بصوت عالي لاني افتكرت السبب اللي دخلت علشانه المصحه النفسيه

النهاية


قد يعجبك ايضا

قصة المرايا | قصة قصيرة رعب

البيت المسكون | قصة رعب - قصة قصيرة

تاجر اعضاء | قصة رعب - قصة قصيرة


reaction:

تعليقات